អបអរសាទរនិស្សិតជ័យលាភីអាហារូបករណ៍ទៅបន្តការសិក្សានៅប្រទេសចិន ចូលជួបសម្តែងការគួរសម ជម្រាបលា និងសុំអនុសាសន៍ណែនាំ មុនពេលធ្វើដំណើរទៅប្រទេសចិន នៅដើមខែកញ្ញា ខាងមុននេះ ក្រោមអធិបតីភាព ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភានៃព្រះរាជាណាចក្រកម្ពុជា និងជាប្រធានក្រុមមិត្តភាពព្រឹទ្ធសភាកម្ពុជា ជាមួយសភាប្រឹក្សានយោបាយប្រជាជនចិន វិមាន៧មករា ព្រឹកថ្ងៃទី១៧ ខែសីហា ឆ្នាំ២០២៦

ពង្រឹងកិច្ចសហប្រតិបត្តិការអប់រំ និងបណ្តុះបណ្តាលវិជ្ជាជីវៈវេជ្ជសាស្ត្រ កម្ពុជា-ចិន​(ទីក្រុងថៃចូ, ប្រទេសចិន)៖ នាព្រឹកថ្ងៃទី០៨ ខែកក្កដា ឆ្នាំ២០២៦ ឯកឧត្តម អ៊ុំ វុទ្ធទី ជំនួយការសម្តេចតេជោ ប្រធានព្រឹទ្ធសភា និងជាប្រធានសមាគមទំនាក់ទំនងយុវជនកម្ពុជា-ចិន បានអញ្ជើញចូលរួមក្នុង «កិច្ចប្រជុំវេទិកាផ្លាស់ប្តូរកម្ពុជា-ចិន និងសិក្ខាសាលាសមាហរណកម្មឧស្សាហកម្ម-អប់រំ ស្តីពីកិច្ចសហប្រតិបត្តិការវេជ្ជសាស្ត្រ សុខភាព ថែទាំ និងការអប់រំ» (Sino-Cambodia Exchange Forum and Industry-Education Integration Seminar on Medical, Health, Wellness and Education Cooperation) នៅវិទ្យាស្ថានបច្ចេកវិទ្យា និងវិជ្ជាជីវៈថៃចូ (Taizhou Vocational and Technical College) ខេត្តជឺជាំង ប្រទេសចិន។​ក្នុងឱកាសនោះ ក្នុងនាមប្រធានសមាគមទំនាក់ទំនងយុវជនកម្ពុជា-ចិន ឯកឧត្តម អ៊ុ វុទ្ធទី បានចុះអនុស្សរណៈនៃការយោគយល់គ្នា (MoU) ជាមួយវិទ្យាស្ថាន Taizhou Vocational and Technical College ដើម្បីជំរុញ និងបើកឱកាសឱ្យនិស្សិតកម្ពុជាបានមកបន្តការសិក្សាលើជំនាញឱសថសាស្ត្រ (Pharmacy) និងថែទាំវេជ្ជសាស្ត្រ (Nursing)។​កិច្ចប្រជុំដ៏មានសារៈសំខាន់នេះ ក៏មានការអញ្ជើញចូលរួមពី៖ ​​ឯកឧត្តមសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល (UHS), លោកស្រីសាស្ត្រាចារ្យ Guo Wuyan អនុប្រធានវិទ្យាស្ថាន Taizhou Vocational and Technical College, តំណាងមន្ទីរការបរទេសក្រងថៃចូរ,តំណាងមន្ទីរអប់រំក្រុងថៃចូរ, តំណាងសាកលវិទ្យាល័យអន្តរជាតិ (IU)​ព្រមទាំងសាស្ត្រាចារ្យជំនាញ និងតំណាងក្រុមហ៊ុនជាច្រើនរូប។​កិច្ចសហប្រតិបត្តិការនេះ គឺជាជំហានថ្មីមួយទៀតក្នុងការបណ្តុះបណ្តាលធនធានមនុស្សក្នុងវិស័យសុខាភិបាលដល់យុវជនកម្ពុជា ស្របតាមចំណងមិត្តភាពដែកថែប កម្ពុជា-ចិន៕

ពង្រឹងកិច្ចសហប្រតិបត្តិការអប់រំ និងបណ្តុះបណ្តាលជំនាញវេជ្ជសាស្ត្រ កម្ពុជា-ចិន========= (ទីក្រុងវិនចូ, ប្រទេសចិន)៖ នាព្រឹកថ្ងៃទី០៧ ខែកក្កដា ឆ្នាំ២០២៦ ឯកឧត្តម អ៊ុំ វុទ្ធទី ជំនួយការសម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសមាគមទំនាក់ទំនងយុវជនកម្ពុជា-ចិន បានអញ្ជើញចូលរួមជាគណៈអធិបតីដ៏ខ្ពង់ខ្ពស់ ក្នុង «កិច្ចប្រជុំជំរុញស្តង់ដារជំនាញថែទាំសុខភាព និងវេជ្ជសាស្ត្រ នៃវិទ្យាស្ថានបច្ចេកវិទ្យាវិស្វកម្មក្រៅប្រទេសកម្ពុជា-ចិន ឆ្នាំ២០២៦» ដែលរៀបចំឡើងដោយវិទ្យាស្ថានពហុបច្ចេកវិទ្យា Zhejiang Dongfang Polytechnic នៅទីក្រុងវិនចូ ខេត្តជឺជាំង សាធារណរដ្ឋប្រជាមានិតចិន។​ កិច្ចប្រជុំដ៏មានសារៈសំខាន់នេះ ក៏មានការអញ្ជើញចូលរួមពីសំណាក់ថ្នាក់ដឹកនាំជាន់ខ្ពស់ និងតំណាងស្ថាប័នអប់រំ-សុខាភិបាលនៃប្រទេសទាំងពីររួមមាន៖​លោក TONG WENYUAN លេខាគណៈកម្មាធិការបក្សនៃវិទ្យាស្ថានពហុបច្ចេកវិទ្យា Zhejiang Dongfang Polytechnic, ​លោក Huang Hua អគ្គនាយករងនៃមន្ទីរអប់រំក្រុងវិនចូ, ​ឯកឧត្តមសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល (UHS) និង​លោក វូច ពិសិដ្ឋ តំណាងសាកលវិទ្យាល័យអន្តរជាតិ (IU)​ព្រមទាំងមានការចូលរួមពី សាស្រ្តាចារ្យជំនាញវេជ្ជសាស្រ្ត តំណាងក្រុមហ៊ុន និងតំណាងសមាគមពាណិជ្ជកម្មខេត្តសានតុងប្រចាំកម្ពុជា យ៉ាងច្រើនកុះករផងដែរ។​ក្នុងឱកាសដ៏មានអត្ថន័យនោះ ពិធីចុះអនុស្សរណៈនៃការយោគយល់គ្នា (MoU) ត្រូវបានធ្វើឡើងរវាង សមាគមទំនាក់ទំនងយុវជនកម្ពុជា-ចិន និង វិទ្យាស្ថានពហុបច្ចេកវិទ្យា Zhejiang Dongfang Polytechnic ក្នុងគោលបំណងរួមគ្នាជំរុញ គាំទ្រ និងបើកឱកាសឱ្យនិស្សិតកម្ពុជាបានមកបន្តការសិក្សាលើជំនាញវេជ្ជសាស្ត្រ និងថែទាំសុខភាពនៅប្រទេសចិនឱ្យកាន់តែច្រើនឡើង។​កិច្ចសហប្រតិបត្តិការនិងការជំរុញស្តង់ដាររួមគ្នានេះ គឺជាជំហានគន្លឹះថ្មីមួយទៀតក្នុងការលើកកម្ពស់គុណភាពធនធានមនុស្សក្នុងវិស័យសុខាភិបាលនៅកម្ពុជា ស្របតាមស្មារតីនៃចំណងមិត្តភាពដែកថែប និងការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី។

នៅរសៀលថ្ងៃទី២ ខែកក្កដា ឆ្នាំ២០២៦ ឯកឧត្តម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិត បានទទួលជួបពិភាក្សាការងារជាមួយ លោកស្រី Lu Xiaoxia នាយកផ្នែកធនធានមនុស្សនៃក្រុមហ៊ុន SAILUN។កិច្ចពិភាក្សានេះផ្តោតលើគោលបំណងសំខាន់ៗដូចខាងក្រោម៖- តម្រូវការធនធានមនុស្ស៖ ក្រុមហ៊ុន SAILUN បានបង្ហាញពីតម្រូវការចាំបាច់ក្នុងការជ្រើសរើសបុគ្គលិកដែលមានសមត្ថភាព ដើម្បីបំពេញមុខតំណែងនានាក្នុងក្រុមហ៊ុន។- កិច្ចសហប្រតិបត្តិការ៖ ក្រុមហ៊ុនបានស្នើសុំកិច្ចសហការជាមួយសមាគមនិស្សិត ដើម្បីផ្សព្វផ្សាយ និងណែនាំនិស្សិតកម្ពុជាដែលទើបបញ្ចប់ការសិក្សាពីប្រទេសចិន ឱ្យមកដាក់ពាក្យការងារនៅក្រុមហ៊ុន។ឯកឧត្តម បានសម្តែងនូវការស្វាគមន៍យ៉ាងកក់ក្តៅចំពោះគំនិតផ្តួចផ្តើមនេះ ដោយចាត់ទុកថាជាការចូលរួមចំណែកយ៉ាងសំខាន់ក្នុងការបង្កើតឱកាសការងារ និងជួយដល់និស្សិតដែលទើបបញ្ចប់ការសិក្សាថ្មីៗឱ្យទទួលបានការងារសមស្របនឹងជំនាញដែលពួកគេបានរៀនសូត្រពីប្រទេសចិន។

សិស្សថ្នាក់ទី១២ ចំនួន៣៧៣ នាក់ នៅវិទ្យាល័យ ហ៊ុន សែន ត្រពាំងឫស្សី ទទួលការតម្រង់ទិសអាហារូបករណ៍ទៅសិក្សានៅប្រទេសចិន[ខេត្តត្បូងឃ្មុំ] ៖ នារសៀលថ្ងៃទី១ ខែកក្កដា ឆ្នាំ២០២៦ វិទ្យាល័យ ហ៊ុន សែន ត្រពាំងឫស្សី បានរៀបចំកម្មវិធី «ចុះតម្រង់ទិស លើកទឹកចិត្ត និងផ្សព្វផ្សាយអាហារូបករណ៍ទៅបន្តការសិក្សាថ្នាក់បរិញ្ញាបត្រនៅសាធារណរដ្ឋប្រជាមានិតចិន» ជូនដល់សិស្សានុសិស្សថ្នាក់ទី១២ សរុប ៣៧៣នាក់ ដើម្បីត្រៀមលក្ខណៈសម្បត្តិសម្រាប់ការប្រឡងបាក់ឌុបក្នុងខែសីហា ឆ្នាំ២០២៦ ខាងមុខ។កម្មវិធីនេះប្រារព្ធឡើងតបតាមការអញ្ជើញរបស់ លោក ឃឹម សុខុម នាយកវិទ្យាល័យ ដោយមានកិត្តិយសខ្ពង់ខ្ពស់ពី ឯកឧត្តម អ៊ុំ វុទ្ធទី ជំនួយការសម្តេចតេជោប្រធានព្រឹទ្ធសភា និងជាស្ថាបនិក/ប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) អញ្ជើញជាវាក្មិនកិត្តិយស រួមជាមួយ លោក អ៊ុង ស៊ីមថៃហួរ ប្រធានសមាគមអាណត្តិទី១០ ព្រមទាំងសហការី។ខ្លឹមសារសំខាន់ៗនៃកម្មវិធី៖ការតម្រង់ទិស និងឱកាស៖ ឯកឧត្តម អ៊ុំ វុទ្ធទី បានចែករំលែកពីនីតិវិធីស្នើសុំអាហារូបករណ៍ ការជ្រើសរើសជំនាញឱ្យស្របតាមទីផ្សារពលកម្ម និងបទពិសោធន៍រស់នៅ-សិក្សានៅចិន ក្រោមក្របខណ្ឌមិត្តភាពដែកថែបកម្ពុជា-ចិន។ការយកចិត្តទុកដាក់ពីថ្នាក់ដឹកនាំ៖ ឯកឧត្តមបានរំលេចពីការផ្តល់អាទិភាពខ្ពស់របស់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការបណ្តុះបណ្តាលសមត្ថភាពយុវជនទាំងផ្នែកសង្គម និងវិទ្យាសាស្ត្រ។ការគាំទ្រពីសមាគម៖ លោក អ៊ុង ស៊ីមថៃហួរ បានបង្ហាញពីតួនាទីរបស់សមាគមក្នុងការជួយសម្របសម្រួល និងមើលថែទាំនិស្សិតកម្ពុជាឱ្យទទួលបានជោគជ័យក្នុងការសិក្សានៅប្រទេសចិន។ការចែករំលែកពីជ័យលាភីផ្ទាល់៖ កញ្ញា សេង សារានី អតីតសិស្សនៃវិទ្យាល័យហ៊ុនសែនត្រពាំងឫស្សី និងជាបេក្ខជនជ័យលាភីអាហារូបករណ៍រដ្ឋចិន (តាមរយៈក្រសួងអប់រំ) បានចូលរួមចែករំលែកបទពិសោធន៍ជាក់ស្តែងក្នុងការត្រៀមខ្លួន និងប្រឡងជាប់អាហារូបករណ៍។លោក ឃឹម សុខុម នាយកវិទ្យាល័យ បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំសមាគម ដែលបាននាំយកឱកាសដ៏មានតម្លៃនេះមកចែករំលែកដល់មូលដ្ឋាន។ កម្មវិធីបានបញ្ចប់ទៅក្នុងបរិយាកាសស្និទ្ធស្នាល និងទទួលបានផ្លែផ្កាយ៉ាងត្រចះត្រចង់ ដោយសិស្សានុសិស្សទាំង ៣៧៣នាក់ បានបង្ហាញការចាប់អារម្មណ៍យ៉ាងខ្លាំងក្នុងការកំណត់គោលដៅជីវិត និងបន្តការសិក្សានៅក្រៅប្រទេស ដើម្បីនាំយកចំណេះដឹងមកអភិវឌ្ឍន៍មាតុភូមិវិញ។ ឆ្លៀងក្នុងឱកាសនេះ លោកប្រធានក្រុមប្រឹក្សាភិបាល បានឧបត្ថម្ភថវិកាមួយចំនួន ដើម្បីទ្រទ្រង់បរិស្ថានក្នុងវិទ្យាល័យផងដែរ៕

ខេត្តឧត្តរមានជ័យ ​នៅរសៀលថ្ងៃទី២៤ ខែមិថុនា ឆ្នាំ២០២៦ តបតាមការអញ្ជើញរបស់ លោក គី ចន្ទី នាយកវិទ្យាល័យតេជោសែនសំរោង, ឯកឧត្តម អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ព្រមទាំងជាជំនួយការសម្តេចតេជោប្រធានព្រឹទ្ធសភា និងសហការី បានផ្តល់កិត្តិយសអញ្ជើញចុះរៀបចំកម្មវិធីតម្រង់ទិស លើកទឹកចិត្ត និងផ្សព្វផ្សាយអាហារូបករណ៍ទៅបន្តការសិក្សានៅប្រទេសចិន ជូនដល់ប្អូនៗសិស្សានុសិស្សថ្នាក់ទី១២ ប្រមាណ ១២០នាក់ នៅក្នុងវិទ្យាល័យផ្ទាល់។ ​«ការវិនិយោគលើចំណេះដឹង គឺជាការបើកទ្វារឆ្ពោះទៅរកភាពជោគជ័យ»​នៅក្នុងកម្មវិធីដ៏មានអត្ថន័យនេះ ប្អូនៗសិស្សានុសិស្សក៏បានស្តាប់ការចែករំលែកបទពិសោធន៍ផ្ទាល់ខ្លួនយ៉ាងស៊ីជម្រៅ អំពីគន្លឹះនៃការត្រៀមខ្លួនប្រឡង និងដំណើរការស្នើសុំអាហារូបករណ៍ពីបេក្ខជនជ័យលាភីឆ្នើមចំនួន ២រូប រួមមាន៖​លោក នុត ធួនថារ័តន៍ (អតីតសិស្សវិទ្យាល័យតេជោសែនសំរោង និងជាបេក្ខជនជ័យលាភី ទទួលបានអាហារូបករណ៍ CSCថ្នាក់បរិញ្ញាបត្រពីក្រសួងអប់រំ យុវជន និងកីឡា)​កញ្ញា រីន មួយលៀង (បេក្ខជនជ័យលាភី ទទួលបានអាហារូបករណ៍CSC ថ្នាក់បរិញ្ញាបត្ររបស់ ស.ស.យ.ក)​តាមរយៈកម្មវិធីនេះ ប្អូនៗសិស្សានុសិស្សទទួលបានទាំងចំណេះដឹង ព័ត៌មានអាហារូបករណ៍ និងកម្លាំងចិត្ត ក្នុងការដើរតាមក្តីស្រមៃរបស់ខ្លួន ដើម្បីត្រៀមខ្លួនក្លាយជាទំពាំងស្នងឫស្សីដ៏រឹងមាំសម្រាប់ប្រទេសជាតិ។ឆ្លៀតក្នុងឱកាសនោះ ឯកឧត្តមប្រធាន ផ្តាំផ្ញើជូនប្អូនៗសិស្សានុសិស្ស ត្រូវពង្រឹងឆន្ទះ ខិតខំការសិក្សា ដើម្បីត្រៀមខ្លួនជានិស្សិតអាហារូបករណ៍។ ជាមួយគ្នានេះ ឯកឧត្តមប្រធាន បានឧបត្ថម្ភថវិកាមួយចំនួន ដើម្បីគាំទ្រដល់បរិស្ថានវិទ្យាល័យផងដែរ។

ឯកឧត្តម អ៊ុំ វុទ្ធទី អញ្ជើញជាអធិបតីក្នុងកម្មវិធីតម្រង់ទិស លើកទឹកចិត្ត និងផ្សព្វផ្សាយអាហារូបករណ៍ទៅបន្តការសិក្សានៅប្រទេសចិន ជូនដល់សិស្សានុសិស្សវិទ្យាល័យហ៊ុនសែនឧត្តរមានជ័យ។​ខេត្តឧត្តរមានជ័យ៖ នារសៀលថ្ងៃទី២៤ ខែមិថុនា ឆ្នាំ២០២៦ តបតាមការអញ្ជើញរបស់ លោក អៃ សុគន្ធ នាយកវិទ្យាល័យហ៊ុនសែនឧត្តរមានជ័យ, ឯកឧត្តម អ៊ុ វុទ្ធទី ប្រធានក្រុមប្រឹក្សាភិបាលសមាគម និងជាជំនួយការសម្តេចតេជោប្រធានព្រឹទ្ធសភា ព្រមទាំងសហការី បានអញ្ជើញចុះរៀបចំកម្មវិធីតម្រង់ទិស លើកទឹកចិត្ត និងផ្សព្វផ្សាយអាហារូបករណ៍ទៅបន្តការសិក្សានៅប្រទេសចិន ជូនដល់សិស្សានុសិស្សថ្នាក់ទី១២ ចំនួន ៣៧២នាក់។​ក្នុងកម្មវិធីដ៏មានសារៈសំខាន់នេះ ប្អូនៗសិស្សានុសិស្សទទួលបាននូវ៖​ការចែករំលែកបទពិសោធន៍ស៊ីជម្រៅ៖ គន្លឹះនៃការត្រៀមខ្លួនប្រឡង និងដំណើរការស្នើសុំអាហារូបករណ៍រដ្ឋាភិបាលចិន (CSC) ពីបេក្ខជនជ័យលាភីឆ្នើម ២រូប គឺ៖១. ​លោក នុត ធួនថារ័តន៍ (ជ័យលាភីថ្នាក់បរិញ្ញាបត្រ តាមរយៈក្រសួងអប់រំ យុវជន និងកីឡា)២. ​កញ្ញា រីន មួយលៀង (ជ័យលាភីថ្នាក់បរិញ្ញាបត្រ តាមរយៈ ស.ស.យ.ក)​មានប្រសាសន៍ផ្ដាំផ្ញើក្នុងឱកាសនោះដែរ ឯកឧត្តមប្រធាន បានលើកទឹកចិត្តឱ្យប្អូនៗពង្រឹងឆន្ទៈ និងខិតខំសិក្សារៀនសូត្រដើម្បីត្រៀមខ្លួនជានិស្សិតអាហារូបករណ៍នាពេលខាងមុខ។ ជាមួយគ្នានេះ ឯកឧត្តមក៏បានឧបត្ថម្ភថវិកាមួយចំនួន ដើម្បីចូលរួមគាំទ្រដល់បរិស្ថានរបស់វិទ្យាល័យផងដែរ។

ដំណើរទស្សនកិច្ច និងពិភាក្សាការងារ ដើម្បីស្វែងរកឱកាសការងារ ជូននិស្សិតបញ្ចប់ការសិក្សាពីប្រទេសចិន================​នារសៀលថ្ងៃទី២៩ ខែឧសភា ឆ្នាំ២០២៦ ឯកឧត្តម អ៊ុ វុទ្ធទី ប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន និងជាប្រធានសមាគមទំនាក់ទំនងយុវជនកម្ពុជា-ចិន ព្រមទាំងជាជំនួយការសម្តេចតេជោ បានដឹកនាំគណៈប្រតិភូសមាគម អញ្ជើញទៅទស្សនកិច្ច និងពិភាក្សាការងារ នៅក្រុមហ៊ុន រោងចក្រ UP Aluminum (顶峰铝业制造（柬埔寨）有限公司) ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសខេត្តកំពង់ចាម។​ជំនួបពិភាក្សាការងារនេះ ធ្វើឡើងក្នុងគោលបំណងយ៉ាងសំខាន់ក្នុងការស្វែងយល់ពីសង្វាក់ផលិតកម្ម ក៏ដូចជាផ្សព្វផ្សាយ និងបង្កើតឱកាសការងារល្អៗ ជូនដល់ប្អូនៗនិស្សិតកម្ពុជាដែលបានបញ្ចប់ការសិក្សាពីសាធារណរដ្ឋប្រជាមានិតចិន ឱ្យស្របទៅនឹងជំនាញ និងសក្តានុពលរបស់ពួកគេ ដើម្បីចូលរួមចំណែកអភិវឌ្ឍន៍សេដ្ឋកិច្ចជាតិ។​ជាលទ្ធផលគួរឱ្យត្រេកអរ ក្រុមហ៊ុនបានបង្ហាញពីតម្រូវការកម្លាំងពលកម្មជំនាញ និងផ្តល់ជូននូវកម្រិតប្រាក់បៀវត្សរ៍យ៉ាងខ្ពស់ ទៅតាមប្រភេទមុខតំណែងដូចខាងក្រោម៖​🎯 ១. ប្រភេទមុខតំណែងអាជីវកម្មស្នូល (Core Business Positions)៖​គ្របដណ្តប់លើវិស័យស្នូលចំនួនបួន៖ ពាណិជ្ជកម្មអន្តរជាតិ ការស្រាវជ្រាវ និងអភិវឌ្ឍន៍ (R&D) ខ្សែសង្វាក់ផ្គត់ផ្គង់ និងប្រតិបត្តិការផលិតកម្ម (រួមទាំងមុខតំណែងរងដូចជា ការលក់ និងវិស្វកម្មដំណើរការ)។​🎯 ២. មុខតំណែងមុខងារទូលំទូលាយ (Comprehensive Functional Positions)៖​រួមបញ្ចូលទាំងផ្នែកមុខងារសំខាន់ៗចំនួនបី៖ ការគ្រប់គ្រងទូលំទូលាយ ហិរញ្ញវត្ថុ និងបច្ចេកវិទ្យាព័ត៌មាន (IT) (រួមទាំងមុខតំណែងរងដូចជា ធនធានមនុស្ស រដ្ឋបាល និងទំនាក់ទំនងរដ្ឋាភិបាល)។​💰 កម្រិតប្រាក់បៀវត្សរ៍ដែលផ្តល់ជូន៖​🎓 ថ្នាក់បរិញ្ញាបត្រ៖ 800$ - 1,200$​🎓 ថ្នាក់បរិញ្ញាបត្រជាន់ខ្ពស់៖ 1,000$ - 1,500$​🎓 ថ្នាក់បណ្ឌិត៖ 1,500$ - 2,000$✍️ក្រុមហ៊ុន ក៏មានផ្តល់ការស្នាក់នៅ និងអាហារ ព្រមទាំងការបណ្តុះបណ្តាលបន្ថែមជូនបុគ្គលិកផងដែរ។